كلوووووو يوسع ماما شلبيه جااااااااايه

قريتنا قرية صغيرة بس مليانة ناس وبهايم وحميير ومعيز حاجات كتيير يعنى ممكن تلاقى عندنا فرن عيش ودكاكيين وقهوة وكمان تلاقى عندنا مكتب بريد وسنترال الصراحة قريتنا احسن كمان من القرية العبقرية بس اكتر حاجة تتميز بيها قريتنا ان عندنا شخصية مش موجودة فى اى حتى فى الدنيا واتحدى

اتحدى اى انسان او حيوان يقول عكس دا عندنا ماما شلبية

وماما شلبية ست مش زى اى ست لما بتكلم لازم كل الرجالة تسكت ولما بتتنفس لازم الكل يهوى على مراوحها عمرها ما قالت حاجة غلط ولاعملت حاجة غلط اصلها ماما شلبية تتصوروا ان اى طفل بتولد فى قريتنا لازم هى اللى تختارة اسمة وشكلة ومستقبلة ويمكن كمان تختار مراتة

ماما شلبية هى كل حاجة فى قريتنا هى الامان والامن والسعادة والفرحة وكمان هى التعاسة والحزن لما بتضحك لازم يضحك الجميع ولما بتبكى الكل لازم ينوح رجالة وستتات واطفال دا كمان ممكن تسمع صوت الميتين فى القبور وهى بتتأثر بكل حاجة تعملها ماما شلبية بس عشان تحس بدا لازم يكون عندك احساس وشعور مرهف

ماما شلبية ملهاش سن معروف ممكن تقول انها شابة صغيرة بس ساعة الجد تلاقيها عجوز حكيمة اصلها ياخوانا ماما شلبية

تتغير وتتلون وتشقلب وتعمل حاجات ميقدرش حد يعملها عفريتة جنية انسية مش عارف ولا حد يعرف بس اللى الجميع يعرفة انها موجودة وهتفضل موجودة قوية متينة لذيذة شديدة اصلها ياخوانا ماما شلبية

ربنا يكون فى عونها ويعنها علينا وعلى اولادنا ويكفيها شر الامراض المصتعصية ويكفيها شرنا احنا الاوباش اللى مش عارفين حاجة ولافهمين اى حاجة ربنا يخليكى لينا ياماما شلبية من كتر حبنا فيها صورتها رسمنها على صدورنا وعلى قلوبنا وبنتمنى كل الدنيا تيجى وتديها جايزة دولية عالمية ملهاش مثيل ولا فى البرازيل ولا حتى فى قرية البراجيل على شهمتها وافكارها وقوتها ويتعلموا منها معنى الحكمة

وعشان كل دا اصبحت ماما شلبية رمز بلدنا ورئيسة المجالس المحرومة والمشئومة وكمان الملعونة وعلى فكرة مفيش مناسبة تحصل الا وتلاقيها موجودة حتى مهما كانت المناسبة دينية سياسية عائلية شخصية ان شاالله حتى لما الجاموسة تولد

انا مش قادر انسى يوم ما كانت بتتكلم ياسلام على كلامها الرزين المتين مع انى مكنتش فاهم حاجة ولا حد من الموجدين كان فاهم اى حاجة بس الحكاية مش اننا نفهم الكلام المهم اننا نحس بية