طاطي راسك-أحمد فؤاد نجم

طاطي راسك طاطي طاطي .. انت ف وطن ديمقراطي .. انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة .. شغلك يطلع من غير لازمة .. علشان مبيعلاش غير واطي طاطي راسك طاطي طاطي .. انت ف وطن ديمقراطي

لما حاميها يكون حراميها .. وبلاده ورا ضهره راميها .. طالع نازل واكل فيها .. مسنود بالبدلة الظباطي طاطي راسك طاطي طاطي .. انت ف وطن ديمقراطي

لما شقاك يصبح مش ليك .. فقرك سد السكة عليك تتلفّت تلقى حواليك .. إما حرامي و إما عقاطي طاطي راسك طاطي طاطي .. انت ف وطن ديمقراطي

لماتلاقي بلاد الدنيا .. فيها البني آدم حاجة تانية .. وانت في الطبقات الدنيا .. قرد مسلسل أو وطواطي طاطي راسك طاطي طاطي .. انت ف وطن ديمقراطي

لما الجهلة يبقوا أمامك .. أو فوقك ماسكين ف زمامك .. ويسوقك ع الهلكة إمامك .. تشرب م السم السقراطي طاطي راسك طاطي طاطي .. انت ف وطن ديمقراطي

لما الكلمة تكون بتدينك .. لما تخبي ف قلبك دينك .. لما الذل أشوفه ف عينك .. هات إحباطك على إحباطي طاطي راسك طاطي طاطي انت ف وطن ديمقراطي .. انت ف وطن ديمقراطي

بصراحه مش عايزه اقولك الكلام جميل
مش عشانه مش جميل
لا
هو جميل وجميل منك انك نقلتهولنا
بس عشانه بكل اسف واقعى الى حد ما
فهقولك ان الكلام محزن اوى
يمكن نكون شعب مبيحبش يصارح نفسه
مش هروب
لا
بس عشان الوطن الديمقراطى ده
وطنا
عشان لو احنا فعلا هنطاطى
فهنطاطى عشانه
مش عيب ان بلدنا تكون فحاله سيئه او يكون الكلام اللى فالتوبيك ده متوافر فيها
بس العيب ان احنا بنتفرج عليها وهى كده
وكمان بنألف لها كلام نطلع فيه عيوبها
يعنى كان من الممكن ان فؤاد نجم بدل ما كتب كده
كان كتب كلام تشجيعي
مقصدش انى اضايقك بردى او بمرورى
بالعكس انت مشكوووووور جدا
بس انا عايزه اقول ان بلدنا ديه متخلقتش كده
لا
بس احنا اللى خليناها كده
لو كل واحد ابتدى من نفسه هيكون الوضع افضل من كده
وفى النهايه
لا نملك سوى الدعاء بان يصلح الله الاحوال
جزاك الله خيرااا

للاسف هوة دة الى بيحصل ودى الحقيق الى كل بيهرب منها
بس نرجع نقول البلد دى احسن من غيرها
وربنا يهدى كل الناس

» من احمد فؤاد نجم لحسنى مبارك
» |• تدشين مقر انتخابى للفريق أحمد شفيق بمدينة العريش|6|6|2012